मूल्यवर्धन अनुभव कथन

मूल्यवर्धन हा उपक्रम मुलांमध्ये चांगल्या सवयी व भारताचे चांगले व सुजाण नागरिक बनावेत अशा प्रकारचा बनवलेला आहे.

मूल्यवर्धन वर्गनियम हा उपक्रम मी वर्गात घेतला. त्यामुळे मुले काही नवीन व स्वतः बनवलेले नियम चांगल्या प्रकारे पाळतात. मुलांनी स्वतः नियम तयार केलेले असतात. मुलांना ते पाठांतर करण्याची गरज नाही. त्यांना शिस्त लागते. ‘शांतता संकेत’ वर्ग शांत ठेवण्यासाठी खूप उपयोगी पडतो. शिक्षकांना वर्गव्यवस्थापन सोपे व चांगले जाते. पाठ्यपुस्तकांमधील काही घटक शिकवत असताना मूल्यवर्धनचा उपयोग होतो. मुलांमध्ये कळत-नकळतपणे मूल्ये रुजवण्यासाठी मदत होते. दुसरीतील मुले घरातील नियम चांगल्याप्रकारे सांगतात. उदा. बाहेर जाताना लाईट बंद करणे, वस्तू जागच्या जागी ठेवणे, इतरांकडून मागून आणलेली वस्तू परत करणे इत्यादी. ही मूल्ये मुलांमध्ये खेळांतून रुजविली जातात. मुथ्था फाउंडेशनने मूल्यवर्धन हा मुलांसाठी चांगला कार्यक्रम तयार केला आहे. आम्ही तो शाळेत राबवला. त्यांचे मी खूप आभार मानतो.

-गौतम तुकाराम राऊत

मूल्यवर्धन अनुभव कथन

मुलांमध्ये मूल्य रुजविण्याचे कार्य शाळेमध्ये आधीही परिपाठ, खेळ, सांस्कृतिक कार्यक्रम यांच्या माध्यमातून होतच होते. मूल्यवर्धन कार्यक्रमामुळे याला योग्य दिशा मिळाली. माझ्यापासून सुरुवात करून जगापर्यंत कसे जावे, याचा क्रम समजला. सहयोगी खेळ, जोडीचर्चा, सामुदायिक वर्तुळ या आनंददायी माध्यमातून अभ्यासक्रमापेक्षा वेगळे काही असल्याने मुले आनंदाने सहभागी होऊ लागली. मूल्यवर्धन तासिकेची वाट पाहू लागली. वर्गरचना, वर्गनियंत्रण व स्वयंशिस्त लागण्यासाठी मदत झाली. शांतता संकेत तर खूप प्रभावी आहे. मुलांना विचार करायला, नवीन शोधायला, वेगळे काही करायला यातून चालना मिळाली. मूल्ये म्हणजे काय, त्यांचा जीवनात उपयोग याची जाणीव मुलांना झाली. प्रत्यक्ष कृतीमुळे मुले आनंदी झाली.

-सुहास मुरलीधर पाटील